بارا : 1980) .. الواحة التي لن يجود الزمان بمثلها

أهديها ل: للأخ الفنان عبد الرحمن عبد الله

فتحية الفكي
fatehiamh@yahoo.com

طلَّ الفجر طلَّ الفجر

وهبت مع الشروق نسمات

وانتشر الصباح

صباح الخير على البلدات

وآذان الصباح يردد

في خشوع أجمل الكلمات

لا إله ألا الله ..لا إله ألا الله

وتحملا النسمات

تداعب مخدع كل زول في بارا

أميرة البلدات

**********

وهناكَ في جنب بيتنا

هديك نخلتين واقفات

يداعبن النسيم وتتمايل السفعات

وشوشتن تصحي قمريتين هناك

في النخيل نايمات

هديلن يرحل صداه بعيد ..

هناكَ في الفلوات

وتنزل (شامة) من العنقريب

تردد كمان أيات

(بسم ال الله الرحمن الرحيم ..)

في خفوت وسكات

يا (آمنه) قومي سريع

كبي الجاز وولعي الجمرات

تنزل أمنه .. ما عجلانة

وفي هدوء وسبات

تحس الرملة في رجليها كيف باردات

ما أصلو الندى والدعاش

في الرمال هناك ساكنات

تحتحت ( آمنه ) كانونا

وتولع الجمرات

تغير توبا ..تربط ( المقشاشه )

تنضف الدانقات

تشيل كيسها ..وعديل للسوق

تجيب( العيش ) وبقية الحاجات

ويرتفع النهار في بارا

وتتكرر الحكوات

ما كردفان الغرة ..كلها حكايات

عن الطيبة والحنية

واغنيات بالطيبة مقرونات

**********

يرتفع النهار في بارا

ويبدا يوم جديد

وتتواصل مشاوير السنين

بين الحلة والساقيات

تلاقي الكل يزور الكل

بلا ميعاد وتحديدات

وتتكرر مشاوير المودة

وتترك في النفوس راحات

لا شرطي لا سيارة لا شارات

لا زحمة مرور عصرية .. لا دورية

لا كشّات ..

***************

بين البيوت تلاقى (دجاجاتنا)

وفي أمان حايمات

والخضرة كاسية دروبنا

وريحة الدعاش

مخلوطة بالشافات

والليلمون يدندن في حنان

حاضناهو كم عنبات

وتلقى الطيبه والعفويه

في كل الوجوه دليل وسمات

****************

بارا يا لحنا جميل

حاسنو ما بين الضلوع نغمات

يا دارا كريمة

جمعت كرام الناس

أهل الفضل ِ والحسنات

بارا يا وطنا سقانا الطيبة مرويه

بصوت الذكر والنوبات

بارا الحبيبة ..ياما عشنا فيك سنوات

ومن حضنك خرجنا

وشايلنو حبك في القلوب خفقات

وعشنا العمر في الغربة

وخواطرنا بي ذكراك دوام عامرات

بارا.. رغم الدمعة والآهات

رغم الفرقة والسنوات

يا ريت تحقق أمانينا

وزمانّا ( يعود )

ونعيدا أيامك ولو لحظات ..

******